Kanada, ABŞ texnologiya nəhənglərinə tətbiq ediləcək rəqəmsal xidmətlər vergisini (DST) ilk ödənişlərə cəmi bir neçə saat qalmış ləğv edəcəyini bildirib. Bu addım iki ölkə arasında dayandırılmış ticarət danışıqlarının bərpasına yol açır.
Cümə günü ABŞ Prezidenti Donald Tramp bu vergini “açıq hücum” adlandıraraq danışıqları dayandırdı və Kanadadan idxal etdiyi məhsullara daha yüksək tariflər tətbiq edəcəyi ilə hədələdi. Cavab olaraq, Kanada bazar ertəsi günündən qüvvəyə minəcək ödənişlərin yığılmasını dayandıracağını və vergini ləğv etmək üçün qanunvericilik təqdim edəcəyini açıqladı.
Ağ Evin iqtisadi müşaviri Kevin Hassett “Fox News”a açıqlamasında bildirib ki, bu qərardan sonra iki ölkə arasında danışıqlar “mütləq şəkildə” bərpa olunacaq.
DST vergisi Amazon, Meta, Google və Apple kimi ABŞ texnologiya şirkətlərinə Kanadada 20 milyon dollardan çox gəlir əldə etdikləri təqdirdə 3% vergi tətbiqini nəzərdə tuturdu.
DST-nin birinci ilində ABŞ texnologiya şirkətlərindən 2 milyard Kanada dollarından çox xərc çıxacağı proqnozlaşdırılırdı. Ötən ilki federal büdcədə bu verginin beş il ərzində 5.9 milyard Kanada dolları gəlir gətirəcəyi təxmin olunurdu.
ABŞ Ticarət Katibi Hovard Lutnik bazar ertəsi sosial mediada Kanadanın bu vergini ləğv etməsini alqışlayaraq, bunun hər hansı bir ticarət razılaşmasının qarşısını ala biləcək “müqavilə pozucu” bir faktor olduğunu qeyd edib.
Kanadanın ixracının 75%-i ABŞ-a yönəlir və bu, illik 400 milyard dollardan çox ticarət deməkdir. ABŞ isə öz məhsullarının yalnız 17%-ni Kanadaya ixrac edir.
Amerika Ticarət Palatası da bu qərarı müsbət qarşılayıb və bunu “iki ölkə arasında iqtisadi tərəfdaşlığın gücləndirilməsinə yönəlmiş konstruktiv addım” kimi qiymətləndirib.
Kanadanın bu addımı, ABŞ ilə münasibətlərdəki bir neçə aylıq qeyri-müəyyənlikdən sonra atılıb. Trampın ikinci prezidentlik müddətində texnologiya şirkətlərinə yaxınlığı bu qərarı sürətləndirən əsas amillərdən biri olub.
DST məsələsində Kanadada da narahatlıq var idi. Biznes qurumları bildirirdilər ki, bu xərc sonda istifadəçilərə ötürüləcək. Ottava isə ABŞ-dan dəfələrlə xəbərdarlıq almışdı ki, bu vergi ticarət münasibətlərini poza bilər.
