Ağ Evin yaxınlığında baş verən və bir ABŞ Milli Qvardiya üzvünün ölümü, digərinin isə ağır yaralanması ilə nəticələnən atışmadan bir gün sonra Prezident Donald Tramp indiyədək irəli sürdüyü ən ciddi miqrasiya təklifini açıqlayıb – “bütün Üçüncü Dünya ölkələrindən miqrasiyanı daimi olaraq dayandırmaq”.
Bu açıqlama çərşənbə günü prezident kompleksinin yaxınlığında Əfqanıstan vətəndaşı Rahmanullah Lakanvalı iki Milli Qvardiya üzvünə atəş açmasından sonra verilib. Lakanval əvvəllər Əfqanıstanda Mərkəzi Kəşfiyyat İdarəsi (CIA) ilə işləyib və ABŞ-a Əfqanıstan tərəfdaşları üçün nəzərdə tutulan qoruma proqramı çərçivəsində daxil olub. O, yaralanaraq həbs edilib. Hədəfə alınan hərbçilərdən biri Sara Bekstrom cümə axşamı günü aldığı xəsarətlərdən dünyasını dəyişib.
Tramp atışmanı daha geniş miqrasiya islahatı ilə əlaqələndirir
“Truth Social”da sərt tonda paylaşım edən Prezident bildirib ki, ABŞ-ın miqrasiya sistemi “Bayden dövründə milyonlarla qanunsuz qəbul” nəticəsində zəifləyib və ölkə daxili sabitliyi bərpa etmək üçün ciddi tədbirlər görməlidir.
Tramp əlavə edib ki, “daxili sakitliyi pozan miqrantların vətəndaşlığını ləğv etmək” və “ictimai yük, təhlükəsizlik riski və ya Qərb Sivilizasiyası ilə uyğun olmayan” bütün əcnəbiləri deportasiya etməyi planlaşdırır.
Onun X-dəki paylaşımında deyilir:
“ABŞ sisteminin tam bərpa olunmasına imkan vermək üçün bütün Üçüncü Dünya ölkələrindən miqrasiyanı daimi olaraq dayandıracağam, Baydenin milyonlarla qanunsuz qəbulunu ləğv edəcəyəm və ölkəmizə fayda verməyən, yaxud onu sevməyə qadir olmayan hər kəsi çıxaracağam; vətəndaş olmayanlara bütün federal yardım və subsidiyaları dayandıracağam, daxili sakitliyi pozan miqrantların vətəndaşlığını ləğv edəcəyəm, ictimai yük və ya təhlükə yaradan hər bir əcnəbini deportasiya edəcəyəm”.
Prezident bildirib ki, yalnız giriş qaydalarını sərtləşdirmək kifayət deyil və vəziyyətin onun adlandırdığı kimi “əks miqrasiya”ya ehtiyacı var: “Bu vəziyyəti tam şəkildə yalnız ƏKS MİQRASİYA həll edə bilər… AMERİKANIN dəyərlərinə nifrət edən, oğurlayan, qətl edən və dağıdanlar istisna olmaqla, hamıya XOŞBƏXT ŞÜKRAN GÜNÜ arzulayıram! Siz burada çox qalmayacaqsınız”.
Foto: BBC
