2020-ci ilin dekabrından 2023-cü ilin dekabrına qədər Kanadada 105 milyondan çox COVID-19 peyvənd dozası tətbiq olunub.
Kanadanın federal ictimai səhiyyə qurumu vaksin nəticəsində zərər görən şəxslərə kompensasiya verən proqramı öz üzərinə götürməyə qərar verib. Qeyd edək ki, vaksin zədələri üzrə dəstək proqramı Kanadada COVID-19 peyvəndlərinin geniş tətbiqindən sonra, 2021-ci ilin iyununda müraciətləri qəbul etməyə başlayıb.
CBC-nin yazdığına görə, Kanada Səhiyyə Nazirliyi tərəfindən təsdiqlənmiş və 2020-ci ilin dekabrın 8-dən sonra vurulan vaksin nəticəsində “ciddi və daimi zədə” alan şəxslər proqrama müraciət edə bilirdilər. Hökumət proqramın idarə olunması üçün üçüncü tərəf kimi Oxaro şirkəti ilə müqavilə bağlamışdı. Bu müqavilə ötən həftə başa çatıb və açıqlamaya görə, artıq Səhiyyə Nazirliyi yeni proqramı özü idarə edəcək.
Yan təsirlər çox nadirdir
Köhnə proqrama edilən müraciətlər avtomatik olaraq yenisinə köçürüləcək. Kvebek isə öz ayrıca kompensasiya proqramını davam etdirəcək.
2020-2023-cü illər arasında tətbiq olunan 105 milyondan çox peyvənd vurulmasına baxmayaraq, məlumatlar göstərir ki, ciddi yan təsirlər olduqca nadirdir. Səhiyyə Nazirliyi bildirir ki, cəmi 58 min 712 nəfərdə yan təsir qeydə alınıb ki, bu da ümumi dozanın 0.056%-idir. Onlardan 11,702-si ciddi hesab olunub (0.011%).
Fərdi hallar və narazılıqlar
39 yaşlı Kayla Pollok vaksin nəticəsində zərər gördüyünü bildirən şəxslərdən biridir. Ontario sakini olan qadın 2022-ci ildə gücləndirici doza aldıqdan sonra sinədən aşağı hissəsi iflic olub və ona onurğa beyninin iltihabı – kəskin transvers mielit diaqnozu qoyulub.
O, 2022-ci ildə kompensasiya üçün müraciət etsə də, hələ də kompensasiya üçün qərar verilmədiyini deyir.
Yeni dəyişikliklər
Yeni proqram çərçivəsində bəzi dəyişikliklər nəzərdə tutulur:
- Əvvəlki proqram tərəfindən rədd edilən 225 müraciətə yenidən baxılacaq
- Simptomları gec ortaya çıxan şəxslər üçün daha çevik yanaşma tətbiq olunacaq
Bununla yanaşı, rəsmi qurumlar bildirir ki, müraciətlərin emalı üçün konkret vaxt standartları hələ müəyyən edilməyib və sistemin tam təhlili üçün bir neçə ay lazım olacaq.
Tənqidlər və araşdırmalar
Global News tərəfindən aparılan araşdırmaya görə, Oxaro şirkəti müraciətlərin çoxluğunu idarə etməyə hazır olmayıb və proqram üçün ayrılan 50.6 milyon dolların 33.7 milyonu inzibati xərclərə sərf olunub.
Ekspert rəyi
Ekspert Kumanan Vilson hesab edir ki, belə proqramlar vaksinlərə olan etimadı artırmaq üçün vacibdir və hökumətin sosial məsuliyyətinin bir hissəsidir. Onun sözlərinə görə, proqram vaksinləri təşviq edən qurumlardan müstəqil fəaliyyət göstərməlidir ki, ictimai etimad güclənsin.
Statistik göstəricilər
2025-ci ilin dekabrın 1-nə qədər proqrama 3,557 nəfər müraciət edib. Müraciətlərdən 451-i qəbul edilməyib. 3 mindən çox müraciət tibbi baxışa göndərilib. 252 nəfərə isə 21 milyon dollardan çox kompensasiya ödənilib.
Qeyd olunur ki, tibbi sənədlərin toplanması uzun vaxt apardığı üçün müraciətlərin baxılma müddəti uzana bilər.
Proqrama müraciət etmək üçün bu linkdən istifadə edə bilərsiniz.
