Kanada Statistika Komitəsinin məlumatına görə, kanadalı ev təsərrüfatlarının borcları artıq altıncı rüb ardıcıl olaraq gəlirlərdən daha sürətlə artır.
Qurum bildirir ki, bu ilin birinci rübündə ev təsərrüfatlarının kredit bazarı üzrə borclarının sərəncamda qalan gəlirlərə nisbəti mövsümi düzəliş edilmiş hesablamalara əsasən 0,9 faiz bəndi artaraq 179,6 faizə çatıb. Başqa sözlə, hər 1 dollar sərəncamda qalan gəlirə qarşı təxminən 1,80 dollar kredit borcu düşür.
Ev təsərrüfatlarının borc xidməti göstəricisi – yəni kreditlər üzrə əsas məbləğ və faiz ödənişlərinin sərəncamda qalan gəlirə nisbəti – 2026-cı ilin birinci rübündə 14,75 faiz olub. Bu göstərici 2025-ci ilin dördüncü rübündə 14,68 faiz idi. İstehlak kreditləri, ipoteka və digər kreditləri əhatə edən ümumi borclanma həcmi bu ilin ilk rübündə 35,5 milyard dollar təşkil edib. Bu rəqəm ötən ilin son rübündə 34,5 milyard dollar olmuşdu. Eyni zamanda yeni verilən ipoteka kreditlərinin həcmi 26,3 milyard dollardan 22,6 milyard dollara düşsə də, istehlak kreditləri və ipoteka olmayan borclardakı artım ümumi borclanmanı yüksəldib.
