Kanada Statistika Komitəsinin məlumatına görə, hazırda 4,6 milyon kanadalı dövlət sektorunda çalışır. Müqayisə üçün qeyd edək ki, 13,8 milyon nəfər özəl sektorda işləyir, 2,7 milyon nəfər isə fərdi sahibkardır.
Bu o deməkdir ki, dövlət sektorunda çalışanlar (hökumət və ya hökumət tərəfindən maliyyələşdirilən sahələr, məsələn səhiyyə) bütün muzdlu işçilərin dörddə birini və ümumi işçi qüvvəsinin 21,8 faizini təşkil edir.
İqtisadçı Çarlz Lammanın “The Hub” üçün apardığı təhlilə görə, bu göstərici 1994-cü ildə Kanadanın maliyyə böhranına sürüklənməsindən əvvəlki səviyyəyə yaxındır.
1990-cı illərin əvvəllərində dövlət sektorunun payı qısa müddətə 22 faizi keçmişdi. Daha sonra Baş nazir Jan Kretyenin hökuməti defoltdan qaçmaq üçün proqram xərclərini kəskin azaltdı və nəticədə 1999-cu ilə qədər dövlət sektorunun payı 18,6 faizə düşdü.
Son altı ildə Kanadada 833 min yeni dövlət sektoru işi yaradılıb, eyni dövrdə özəl sektorda cəmi 1,2 milyon yeni iş yeri açılıb. Bu isə o deməkdir ki, hər yeni dövlət işi cəmi 1,4 yeni özəl sektor işi ilə dəstəklənir. Bu isə dayanıqsız nisbət hesab olunur.
Eyni zamanda, fərdi sahibkarların sayı azalıb: 2020-ci ilin əvvəlində 2,8 milyon olan bu rəqəm indi 2,7 milyondur.
Analitiklər uzun müddətdir xəbərdarlıq edirlər ki, Kanada dövlət borcu hesabına hökumət işlərini artıraraq əmək bazarının real vəziyyətini gizlədir.
Hətta son illərdə də özəl sektorda böyük ixtisarlar dövlət sektorunda artımla kompensasiya edildiyi üçün ümumi işsizlik səviyyəsi dəyişməz qalıb. Məsələn, 2024-cü ilin iyulunda özəl sektor 42 min iş yeri itirdiyi halda, dövlət sektorunda 41 min yeni iş açılıb.
2023-cü ilin mayından 2024-cü ilin mayına qədər dövlət sektorunda 208 min, özəl sektorda isə 190 min yeni iş yaradılıb.
Fraser İnstitutunun 2024-cü ilin oktyabr təhlilinə görə, dövlət sektorunda çalışanlar qeyri-dövlət sektorundakı həmkarları ilə müqayisədə orta hesabla 4,8 faiz daha yüksək əməkhaqqı alır, daha çox xəstəlik günü, daha erkən pensiya və daha səxavətli sosial paketlərdən faydalanırlar.
Baş nazir Mark Karni federal dövlət qulluğunda ixtisarlar vəd etsə də, bu addım yalnız son dövrdəki işəqəbul artımının kiçik bir hissəsini geri çevirə bilər.
Dövlət sektorunda çalışan 4,6 milyon nəfərdən yalnız 357 mini federal dövlət qulluğunda işləyir. Qalan 4,25 milyon nəfər əyalət hökumətlərində, məktəblərdə, dövlət korporasiyalarında və ya səhiyyə sahəsində çalışır.
