Mərkəzi Bank 2026-cı ilin sonuna qədər ÜDM-in 1,5 faiz daha aşağı olacağını gözləyir
Kanada Mərkəzi Bankının hesabatında qeyd olunur ki, ABŞ-ın ticarət siyasətindəki dəyişikliklər Kanadanın iqtisadiyyatına uzunmüddətli mənfi təsir göstərəcək.
Mərkəzi Bankın rəhbəri Tiff Maklem deyir ki, ilin ilk yarısında ticarət gərginliyi qeyri-müəyyənliyi artıraraq ÜDM-in azalmasına, ixrac və biznes investisiyalarının düşməsinə, işsizliyin artmasına səbəb olub. O əlavə edib ki, 2026-cı ildə ixrac və investisiyalar bərpa olunmağa başlayanda iqtisadi artım yenidən sürətlənəcək.
İkinci rübdə ÜDM 1,6 faiz azalıb. Polad və alüminium ixracı ötən illə müqayisədə təxminən 25 faiz, ümumi ixrac isə 5 faiz geriləyib.
Eyni dövrdə avtomobil satışlarındakı artım səbəbindən istehlak xərcləri bir qədər yüksəlib. Mənzil satışı və tikinti də artaraq yaşayış sektoruna müsbət təsir göstərib.
Əsasən yanacaq və ərzaq qiymətlərinin bahalaşması nəticəsində illik inflyasiya sentyabrda gözlənilmədən 1,9 faizdən 2,4 faizə yüksəlib. Əsas inflyasiya göstəriciləri (ərzaq, enerji və ipoteka faizlərini istisna edən) təxminən 3 faiz səviyyəsində qalır.
Bank hesab edir ki, inflyasiya 2026-cı ilin əvvəlində 2 faiz ətrafında sabitləşəcək və 2027-ci ilə qədər bu səviyyədə qalacaq. Əgər bu dəyişərsə, Bank “müvafiq reaksiya verməyə hazır olduğunu” bildirib.
2026-2027-ci illərdə bizi nə gözləyir
Tariflərin və ticarət qeyri-müəyyənliyinin təsiri gələn il də davam edəcək və iqtisadi artım daha zəif trayektoriya ilə gedəcək. Yanvar proqnozu ilə müqayisədə Kanada Mərkəzi Bankı 2026-cı ilin sonuna qədər ÜDM-in 1,5 faiz (təxminən 40 milyard dollar) daha aşağı olacağını gözləyir. 2026–2027-ci illər üçün iqtisadi artım orta hesabla 1,4 faiz səviyyəsində proqnozlaşdırılır.
İxracatın 2026-cı ildən artacağı gözlənilsə də, əvvəlki səviyyəyə çatmayacaq. 2025-ci ilin ikinci yarısında tariflər və ABŞ-da tələbin azalması səbəbindən ixracın, eləcə də idxalın azalacağı proqnozlaşdırılır.
Qlobal iqtisadi artımın isə 2026–2027-ci illərdə təxminən 3 faiz səviyyəsinə düşəcəyi gözlənilir.
