Ford hökuməti bildirib ki, Ontarioda yüksək riskli cinayətkarlarla bağlı ictimai məlumatların yerləşdiriləcəyi yeni əyalət saytı yaradılacaq. Buraya polis rəisinin ictimai xəbərdarlıq etdiyi “yüksək riskli seksual zorakılıq törədən şəxslər” haqqında məlumatlar da daxil olacaq.
Baş prokuror və ictimai təhlükəsizlik naziri Maykl Kerzner bu açıqlamanı bazar ertəsi “Ontario Küçələri və İcmalarının Qorunması Aktı, 2026” adlı yeni qanun layihəsinin təqdimatı çərçivəsində edib.
Yeni sayt qanun layihəsinin “Qurbanların və həssas şəxslərin qorunması” bölməsində nəzərdə tutulan tədbirlərdən biridir. Layihəyə əsasən, Ontario Əyalət Polisi Komissarına yüksək riskli cinayətkarlar haqqında məlumatları ictimai əyalət saytında paylaşmaq səlahiyyəti veriləcək.
Hazırda qüvvədə olan 2019-cu il tarixli “İcma Təhlükəsizliyi və Polis Xidməti Aktı”na əsasən, polis rəisləri yüksək riskli cinayətkarlarla bağlı məlumatları ictimai xəbərdarlıqlar vasitəsilə paylaşa bilirlər. Bu məlumatlar əsasən ayrı-ayrı polis idarələrinin saytlarında və ya sosial media hesablarında yayımlanır.
Yeni dəyişikliklərlə isə həmin məlumatların vahid əyalət saytında yerləşdirilməsi planlaşdırılır. Qanun layihəsində bildirilir ki, məqsəd ictimaiyyətin təhlükəsizliyini artırmaqdır.
Qanun qəbul edilərsə, yeni saytın 2027-ci ilin aprel ayına qədər fəaliyyətə başlaması gözlənilir.
İnsan alveri qurbanlarının 50 min dollara qədər borcu silinəcək
Maykl Kerzner bildirib ki, hökumət Ontarioda küçələrin təhlükəsizliyini təmin etməyə fokuslanıb: “Bu qanun polisə qanunsuz fəaliyyətlərlə mübarizə aparmaq, qurbanları və həssas insanları qorumaq, həmçinin cinayətkarları məsuliyyətə cəlb etmək üçün daha güclü alətlər verəcək”.
Qanun layihəsində insan alveri qurbanlarına 50 min dollara qədər borc yükünün silinməsi də nəzərdə tutulur. Sənəddə qeyd edilir ki, insan alveri qurbanları çox vaxt məcbur edilərək götürdükləri borclar səbəbindən uzunmüddətli maliyyə çətinlikləri yaşayırlar və bu, onların normal həyata qayıtmasına mane olur.
Layihədə həmçinin iri magistral yollarda təşkilatlanmış mağaza oğurluqları ilə mübarizə üçün avtomatik nömrə tanıma kameralarının istifadəsi, eləcə də evakuator və avtomobil saxlama sektoruna nəzarətin gücləndirilməsi ilə bağlı dəyişikliklər də yer alıb.
Foto: AI
