Təbriz Azərbaycan Musiqi və Rəqs Ansamblının təşkilatçılığı ilə hazırlanan tamaşa anşlaqla keçdi
Ötən həftəsonu Təbriz Azərbaycan Musiqi və Rəqs Ansamblının (TAMDE) təşkilatçılığı ilə Üzeyir Hacıbəyovun “O olmasın, bu olsun” (Məşədi İbad) operettası ilk dəfə Kanadanın Toronto şəhərində professional səhnədə tamaşaya qoyuldu. Anşlaqla keçən tamaşanı seyrçilər ayaq üstə dayanmadan alqışladılar. İstedadlı sənətçilərin canlandırdığı klassik əsər tamaşaçılara yaddaqalan bir axşam bəxş etdi.
Qeyd edək ki, Azərbaycan musiqili operalarının səhnələşdirilməsi ideyası ansamblın təsisçilərindən biri Şervin Şadpur tərəfindən irəli sürülüb. Ş.Şadpur notların hazırlanması, xorun təlimi və idarəçiliyini, həmçinin tamaşanın rejissorluğunu öz üzərinə götürüb. Musiqi qrupunun rəhbəri Polad Kəşəf, rəqs kollektivinin quruluşçu rejissoru isə Ramin Şadpur və Aylin Kəşəfdir.
Yeni quruluşda təqdim edilən teatr layihəsi film və canlı ifaların birləşməsindən ibarətdir. Layihəyə Şervin Şadpur, Nəsrin Əttari və TAMDE-nin idarə heyəti rəhbərlik edir.
Tamaşada əsas rolların ifaçıları:
Məşədi İbad – Rövşən Tağıoğlu
Sərvər – əməkdar artist Həsən Ənəmi
Gülnaz – Səhər Şərifian
Rüstəm bəy – Məhəmməd Peyğəmbəri
Hambal – Nasir Gözərçiyamin
Qoçu Əsgər – Məhəmməd Kəsbi
Rza bəy – Bəhzad Bolandi
Həsənqulu bəy – Vahid Əttari
Məşədi Qəzənfər – Səid Şirazi
Sənəm – Pərvin Razi
Qeyd edək ki, Təbriz Azərbaycan Musiqi və Rəqs Ansamblı 2003-cü ildə yaradılıb. Missiyası Azərbaycan musiqisini, rəqsini və mədəniyyətini vətəndən uzaqlarda yaşatmaq və kanadalılara tanıtmaqdır.
Fotoların müəllifi: Siavaş Həqiqi
