Ötən il Kanadada 7,000 restoran fəaliyyətini dayandırıb
Pandemiyadan sonra Kanadanın restoran sənayesi müəyyən qədər bərpa olunsa da, istehlakçıların xərclərini azaltması səbəbindən bu il minlərlə restoranın bağlanacağı gözlənilir.
Dalhousie Universitetinin yeni araşdırmasına görə, ötən il Kanadada 7,000 restoran fəaliyyətini dayandırıb. Dalhousie Universitetinin Aqro-Ərzaq Analitikası Laboratoriyasının direktoru Silveyn Çarlebois bildirib ki, son bir neçə ildə ümumilikdə restoranlar üçün vəziyyət son dərəcə çətin olub. Universitetin proqnozuna əsasən, 2026-cı ildə daha 4,000 restoranın bağlanması gözlənilir.
S.Çarleboisin sözlərinə görə, istehlakçılar qida büdcələrinə daha qənaətlə yanaşmağa başlayıblar.
Ərzaq qiymətlərinin və inflyasiyanın artması ilə yanaşı, Kanada Restoranları Təşkilatı (Restaurants Canada) restoranların üzləşdiyi problemlər sırasında icarə, sığorta və əməkhaqqı xərclərinin yüksəlməsini də göstərir. Təşkilatın məlumatına görə, restoranların 41 faizi ya zərərlə işləyir, ya da ancaq xərclərini ödəyə bilir. Buna baxmayaraq, müştərilərin büdcələrinə həssas yanaşdıqlarını bildikləri üçün qiymətləri aşağı saxlamağa çalışırlar.
Restoran satışlarının azalmasının digər səbəblərindən biri də kanadalıların alkoqollu içkiləri daha az istehlak etməsidir. Ölkə üzrə pərakəndə satış məlumatlarına görə, oktyabr ayında alkoqol satışları 10.6 faiz azalıb.
