Kanadanın Britaniya Kolumbiyası əyalətinin Fraser Kanyonu bölgəsində nəzarətdən çıxan meşə yanğını gecə ərzində sürətlə genişlənərək yüzlərlə əmlak üçün təxliyə əmrlərinin verilməsinə və Trans-Kanada avtomobil yolunun bağlanmasına səbəb olub.
“CTVNews”un məlumatına görə, Brunswick Complex adlanan yanğın kompleksi təxminən 115 kvadrat kilometr ərazini əhatə edir. Kompleksə 2 623 hektarlıq Brunswick Creek yanğını və 8 846 hektarlıq Ainslie Creek yanğını daxildir.
Hər iki yanğın nəzarətdən çıxıb. Məlumata görə, Ainslie Creek yanğını Brunswick Creek yanğınından uçan köz parçalarının təsiri nəticəsində başlayıb. İlkin ehtimallara görə isə Brunswick Creek yanğını insan fəaliyyəti nəticəsində yaranıb.
Yanğın kompleksi hazırda Boston Bar yaşayış məntəqəsinin şimalında yerləşən Fraser çayının hər iki sahilinə yayılıb. Alov həmçinin Trans-Kanada avtomobil yolunun hər iki tərəfində davam etdiyindən, Britaniya Kolumbiyası Nəqliyyat Nazirliyi magistralın 10,5 kilometrlik hissəsini bağlayıb.
DriveBC yol məlumatı xidmətinin məlumatına görə, 1 nömrəli magistral yol Boston Bar Station Road ilə Ainslie Road North arasında hələ də bağlıdır.
Bundan əlavə, regional dairədə yerləşən bəzi əmlaklar üçün iki təxliyə xəbərdarlığı da elan olunub.
Britaniya Kolumbiyası Meşə Yanğınları Xidmətinin məlumatına görə, yanğınla mübarizəyə 146 yanğınsöndürən, 12 helikopter və 21 ağır texnika cəlb olunub.
Həmçinin 57 nəfərlik tikililərin mühafizəsi qrupu alovun yaşayış məntəqələrinə yayılmasının qarşısını almaq üçün çalışır. Onlara bölgədəki bir neçə bələdiyyənin yanğınsöndürmə xidmətləri də dəstək verir.
Dağlıq və əlçatmaz ərazi, sıx tüstü və güclü külək yanğınların nəzarət altına alınmasını çətinləşdirir. Nəticədə Hope, Kamloops və Bella Coola da daxil olmaqla Britaniya Kolumbiyasının bölgələrinin böyük hissəsində hava keyfiyyəti ilə bağlı xəbərdarlıqlar edilib.
Meşə Yanğınları Xidməti bildirib ki, buludlu hava səbəbindən temperatur aşağı düşsə də, gün ərzində, xüsusilə günortadan sonra küləyin güclənəcəyi gözlənilir. Bu isə yanğının daha da aktivləşməsinə səbəb ola bilər.
Qurumun proqnozuna görə, həftənin sonuna doğru hava bir qədər sərinləşəcək, lakin yaxın günlərdə əhəmiyyətli yağış gözlənilmir.
Bu yanğın, beş il əvvəl iki nəfərin həyatını itirdiyi və Lytton qəsəbəsinin böyük hissəsinin məhv olduğu dağıdıcı meşə yanğınının ildönümündən cəmi bir neçə gün sonra baş verir. Lytton, Boston Bar qəsəbəsindən təxminən 45 kilometr şimalda yerləşir.
Hazırda yerüstü qruplar ən təhlükəli yanğın ocaqlarını söndürməyə üstünlük verir, yerli yanğınsöndürənlər isə yaşayış evlərinin qorunmasına kömək edir. Gecəgörmə avadanlığı ilə təchiz olunmuş bəzi helikopterlər də daxil olmaqla, hava qrupları şərait imkan verdiyi müddətdə gecə-gündüz fəaliyyət göstərirlər.
Çərşənbə günü səhər saatlarına olan məlumata görə, Britaniya Kolumbiyasında ümumilikdə 20 aktiv meşə yanğını qeydə alınıb. Onlardan 5-i nəzarətdən çıxmış hesab olunur.
Foto: BC Wildfire Service
