Şərabdan zərdab tozuna, parikdən hokkey ləvazimatlarına qədər Kanadadan ABŞ-yə ixrac olunan çoxsaylı məhsullar yeni 50 faizlik tariflə üzləşəcək.
“CTV News”un məlumatına görə, ABŞ hökuməti bu həftə Kanadadan idxal olunan geniş çeşidli məhsullara 50 faiz tarif tətbiq edəcəyini açıqlayıb.
Yeni tariflər 19 avqustdan qüvvəyə minəcək. Ağ Evin açıqlamasına görə, məqsəd Kanada tərəfindən ABŞ-ın avtomobil, spirtli içkilər və süd məhsulları kimi mühüm ixrac mallarına qarşı tətbiq edilən “ayrı-seçkilik xarakterli siyasət” nəticəsində pozulduğu iddia olunan rəqabət balansını bərpa etməkdir.
Bildirilib ki, bu tədbirlər ABŞ şirkətlərinin ticarət fəaliyyətinə mənfi təsir göstərdiyi üçün tətbiq olunur.
Bazar ertəsi ABŞ administrasiyası 338-ci Bölmə (Section 338) üzrə tariflərlə bağlı məlumat sənədi yayıb. Sənəddə qeyd olunur ki, yeni tariflər Kanada–ABŞ–Meksika Sazişi (CUSMA) çərçivəsinə daxil olub-olmamasından asılı olmayaraq, siyahıda yer alan bütün məhsullara şamil ediləcək.
Bundan qısa müddət sonra Kanadanın baş naziri Mark Karni bəyanat yayaraq bildirib ki, yeni tariflər Kanada məhsullarının əhəmiyyətli hissəsini əhatə edir və davam edən ticarət mübahisəsi həm Kanada, həm də xüsusilə ABŞ-də ailələrin yaşayış xərclərini artırır.
Karni deyib ki, bu, ABŞ-nin CUSMA sazişini birbaşa pozaraq tətbiq etdiyi birtərəfli ticarət tədbirlərinin növbəti mərhələsidir. O əlavə edib ki, bu tədbirlərə Kanada avtomobil sektoruna tətbiq edilən və CUSMA-nı pozan tariflər də daxildir: “Kanada isə yalnız beynəlxalq hüquq çərçivəsində öz hüququndan istifadə edərək eyni addımlara cavab verib”.
Ağ Ev: Tariflər şərabdan hokkey ləvazimatlarına qədər yüzlərlə məhsulu əhatə edir
Ağ Ev tarif tətbiq ediləcək məhsulların üç ayrı siyahısını dərc edib.
Bəyanatda bildirilir ki, siyahıya “şərabdan hokkey çubuqlarına, sementə qədər” müxtəlif məhsullar daxildir və bu tariflər ABŞ iqtisadiyyatını gücləndirəcək, ölkəni daha varlı edəcək və ticarətdə qarşılıqlılığı bərpa edəcək.
Tarif tətbiq olunacaq bəzi məhsullar:
Spirtli içkilər:
- Şərab
- Səmənidən hazırlanan pivə
- Rom
- Araq (vodka)
- Brendi
- Tekila
- Viski (o cümlədən İrlandiya və Şotlandiya viskiləri)
Qida məhsulları:
- Süd
- Qaymaq
- Zərdab (whey)
- Melassa
- Təbii bal
Digər məhsullar:
- Buz hokkeyi və otüstü hokkey avadanlıqları (top və konkilər istisna olmaqla)
- Faner
- Efir yağları
- Ətirlər
- Şamlar
- İt qayışları
- Pariklər
Tarif tətbiq ediləcək bəzi ağac məhsulları:
- Yarpaqlı ağaclardan oduncaq
- Taxta kömürü
- Yarpaqlı ağac materialları
- Şam ağacından standart qəlib və dekorativ taxta hissələri
- Taxta yonqarından hazırlanan lövhələr (particle board)
- Müəyyən növ MDF və digər lifli lövhələr
- Müəyyən növ faner
Tarifdən azad edilən məhsullar
Ağ Evin məlumatına görə, aşağıdakı məhsullar yeni tariflərdən istisna edilir:
- Enerji məhsulları
- Kalium gübrəsi (Potash)
- Bəzi balıq məhsulları
- Kritik minerallar
ABŞ hökuməti bildirib ki, 19 avqustdan etibarən siyahıda yer alan Kanada məhsullarına 50 faizlik tarif tətbiq olunacaq.
Tam siyahıya buradan baxa bilərsiniz.
Foto: Graeme Sloan/EPA
