Kanada, ABŞ-ın H-1B vizası üçün 100,000 dollarlıq müraciət haqqı tətbiq etməsi ilə əlaqədar yüksək ixtisaslı texnologiya mütəxəssislərini cəlb etmək səylərini artırır və bununla bağlı yeni proqram açmağı planlaşdırır.
Bu təşəbbüs beynəlxalq istedadlar üçün, xüsusilə də ABŞ-da artan xərclər və iş bazarındakı maneələr səbəbindən alternativ axtaranlar üçün yeni imkanlar açacaq.
Baş nazir Mark Karni canlı efirdə etdiyi çıxışda bildirib ki, hökumətin qarşıdan gələn büdcəsində ölkənin iqtisadi və sosial imkanlarına uyğun miqrasiya səviyyəsini müəyyənləşdirmək məqsədilə geniş miqyaslı immiqrasiya planı təqdim ediləcək: “Bu, Kanada üçün bir fürsətdir. Hökumət yaxın zamanda H-1B işçilərini cəlb etməyə yönəlmiş yeni təklif paketini açıqlayacaq”.
Plan “istedad strategiyası” adlı bir bölməni də əhatə edir. Məqsəd ixtisaslı mütəxəssisləri Kanadaya cəlb etmək və təlim proqramları vasitəsilə innovasiyaları gücləndirməkdir.
Karni bildirib ki, immiqrasiya səviyyələrini ehtiyaclarımıza və qarşılayacağımız potensiala uyğunlaşdırmaq üçün yeni gələnlər üçün, hamı üçün daha yaxşı nəticələr yaratmaq məqsədilə bu büdcədə Kanadanın yeni immiqrasiya planı təqdim ediləcək.
O, əlavə edib ki, plan elm və innovasiya sahələrində təcrübə proqramlarını genişləndirməyə yönələcək.
Təklif olunan tədbirlər ixtisaslı işçilərə Kanadaya immiqrasiya üçün daha asan və sürətli yollar açacaq, ailələr üçün emal müddətini azaldacaq və inzibati maneələri minimuma endirəcək. Bu da Kanadanı qlobal istedadlar üçün daha cəlbedici bir istiqamətə çevirəcək.
Qeyd edək ki, Tramp administrasiyası 21 sentyabr 2025-ci ildən etibarən yeni H-1B viza müraciətləri üçün 100,000 dollarlıq rüsum tətbiq edib. Ağ Ev bu qərarın “Amerikalı işçiləri qorumaq və H-1B proqramının yerli işçiləri əvəz etmədən tamamlayıcı şəkildə istifadəsini təmin etmək” məqsədi daşıdığını bildirib.
