Air Canada (Kanada Hava Yolları Aviaşirkəti) işçilərin tətilinə son qoymaq üçün Həmkarlar İttifaqı ilə ilkin razılaşmaya gəldiyini açıqlayıb və çərşənbə axşamı planlaşdırılmış uçuşların yarısından çoxunu həyata keçirməyi planlaşdırır.
Şirkət bildirib ki, çərşənbə axşamı əməliyyatları mərhələli şəkildə bərpa edəcək və əsas təyyarələrdən birincisi saat 16:00 ET-də havaya qalxacaq.
“Günün sonuna qədər Air Canada, Air Canada Rouge və Air Canada Express brendləri altında planlaşdırılan uçuşların 53 faizini, əsasən beynəlxalq istiqamətləri icra etməyi nəzərdə tutur. Çərşənbə günü səhər isə Şimali Amerika istiqamətləri üzrə əsas uçuşların sürətlə bərpası planlaşdırılır”, – deyə Air Canadanın icraçı vitse-prezidenti və baş əməliyyat direktoru Mark Nasr CTV-yə bildirib: “Biz müştərilərimizdən üzr istəyirik. Hazırda diqqətimizi onların problemlərini həll etməyə və onları təyinat nöqtələrinə çatdırmağa yönəltmişik. Air Canadadan bilet alan hər kəs markamıza güvənir. Biz bir söz verdik, amma o sözü yerinə yetirə bilmədik. İndi həmin etibarı yenidən qazanacağıq və bu, elə indi başlayır… təyyarələri yenidən göyə qaldırmaqla”.
Şirkət xəbərdarlıq edib ki, tam normal uçuşların bərpası 7–10 gün çəkə bilər, çünki təyyarələr və ekipajlar hazırda lazımi mövqelərdə deyil. Bu müddət ərzində bəzi reyslər ləğv olunmağa davam edəcək.
Air Canada bildirib ki, bütün donanma – Air Canada Express-in Jazz və PAL adı altında işləyən uçuşları istisna olmaqla şənbə günü səhərdən yerə endirilib. Tətil başlayandan bəri təxminən 500 min müştərinin uçuşu ləğv olunub.
Eyni zamanda, şirkət əlavə texniki xidmət və beynəlxalq uçuşlardan ekipajların geri qaytarılması səbəbindən bərpa prosesinin yavaş olacağını bildirib.
Məsələn, Vankuverdən Sidneyə 17 saatlıq uçuşdan sonra eyni ekipajın istirahət tələblərinə görə təyyarəni geri qaytarmaq üçün 24 saat gözləmək lazım gələcək, çünki ehtiyat heyət yoxdur.
Bu müddət ərzində Air Canada müştəri dəstək qrupunu gücləndirib. Hazırda 5 min əməkdaş ləğv olunmuş uçuşlarla bağlı müştərilərə yardım göstərir. Müştərilərə tam geri ödəniş, gələcək səyahət üçün kredit və ya mümkün olduqda rəqib şirkətlər də daxil olmaqla 120-dən çox aviaşirkətə yönləndirmə təklif olunur.
Razılaşmaya görə, uçuşlar göydə olmadıqda bələdçilərin ödənişsiz işlədilməsi praktikasına son qoyulacaq. İttifaq bunu həm də “tarixi mübarizədən sonra sənaye üçün transformasiya xarakterli dəyişiklik” adlandırıb.
Kanada hökuməti şənbə günü Kanada Əmək Məcəlləsinin 107-ci maddəsini tətbiq edərək Həmkarlar İttifaqı və şirkəti məcburi arbitraja yönləndirmişdi. Kanada Sənaye Əmək Münasibətləri Şurası bazar günü təyyarə bələdçilərinə işə qayıtmaq əmri versə də, ittifaq əvvəlcə bu əmri yerinə yetirməmiş və tətili davam etdirmişdi.
Nəhayət, bazar ertəsi axşamı danışıqlar bərpa olunub və tərəflər çərşənbə axşamı səhər tezdən ilkin razılaşmaya gəliblər.
Kanada Əmək Konqresi bildirib ki, Air Canada təyyarə bələdçiləri “ədalətli danışıqlardan yayınmaq istəyən işəgötürənlərə güclü mesaj göndərdilər” və 107-ci maddənin artıq etibarlı vasitə olmadığını sübut etdilər.
