Kanada vətəndaşları artıq Çinə vizasız səfər edə biləcəklər. Baş nazir Mark Karninin Pekinlə münasibətləri yaxşılaşdırmaq istiqamətində atdığı addımlardan sonra Çin Kanada turistləri və işgüzar səfər edənlər üçün viza tələbini ləğv edir.
Çinin Xarici İşlər Nazirliyi bildirib ki, bu həftənin çərşənbə axşamından etibarən və ən azı bu ilin sonuna qədər kanadalılar müddəti 30 günədək davam edən səfərlər üçün viza almaq məcburiyyətində olmayacaqlar.
Hazırda əksər Kanada turistləri Çinə səfər üçün uzun müraciət prosesini keçməli və təxminən 140 dollar rüsum ödəməlidirlər.
Çin COVID-19 pandemiyasından sonra turizmi artırmaq məqsədilə son illərdə bir sıra Qərb ölkələri üçün də viza tələblərini ləğv edib.
Pekin uzun illər davam edən diplomatik gərginlik dövründə kanadalılar üçün viza rejimini saxlamış və Çindən Kanadaya gələn turizm qruplarının sayına məhdudiyyət qoymuşdu.
Foto: The Canadian Press/Sean Kilpatrik
