Kanada vətəndaşlarının 227 ölkədən 184-nə vizasız səyahət etmək imkanı var
Son qlobal pasport reytinqi məlumatlarına əsasən, Kanada pasportunun gücü digər ölkələrlə müqayisədə zəifləməyə davam edir.
Henley Passport Index (HPI) tərəfindən aparılan son hesablamaya görə, Kanada pasportu 184 bal toplayıb. Bu, onun sahibinə dünyada 227 mümkün istiqamətdən 184-nə viza tələb olunmadan səyahət etməyə imkan verdiyini göstərir.
Kanada hazırda Estoniya və Birləşmiş Ərəb Əmirlikləri ilə birlikdə dünyanın ən güclü səkkizinci pasportuna malik ölkə hesab olunur. Bu, indeksin son yenilənməsində yeddinci yerdən bir pillə aşağı düşməsi deməkdir. İlin əvvəlindən bu yana Kanada pasportu daha bir bal itirib və son on ildə ümumilikdə dörd bal azalıb. Beynəlxalq Hava Nəqliyyatı Assosiasiyasının (IATA) məlumatlarına əsasən, HPI mütəmadi olaraq 199 ölkənin pasportunu sıralayır.
Kanada, Venesuela, ABŞ, Vanuatu və Birləşmiş Krallıq ən sürətli bal itkisinə məruz qalan ölkələr arasında yer alır.
Henley and Partners təşkilatının yaydığı məlumatda bu tendensiyanın daha geniş bir prosesin göstəricisi olduğu vurğulanır: “Ənənəvi mobillik liderləri çoxqütblü dünyada mövqelərini itirirlər. İnkişaf etməkdə olan ölkələr viza siyasətlərini yumşaldaraq və diplomatik resurslara sərmayə qoyaraq irəlilədiyi halda, ABŞ və Böyük Britaniya kimi əvvəlki güc sahibləri daha məhdud giriş siyasətləri ilə geri çəkilirlər”.
Böyük Britaniya və ABŞ da yanvar ayından bu yana bir pillə aşağı düşüb – altıncı və onuncu yerlərə. Bir zamanlar bu iki ölkə dünyanın ən güclü pasportlarına sahib idi. Böyük Britaniya 2015-ci ildə, ABŞ isə 2014-cü ildə ilk yeri tuturdu.
Hazırda ABŞ, HPI-nin 20 illik tarixində ilk dəfə olaraq ilk onluqdan çıxmaq üzrədir.
Hazırkı reytinqdə Sinqapur, Yaponiya və Cənubi Koreya ilk üç yeri tutur, ardınca isə 15 Avropa ölkəsi gəlir.
