“Əhali nəzarətsiz şəkildə artır, sərhədimiz isə tamamilə açıq qalıb”
Müxalifət lideri Pyer Poliyevr bildirib ki, Kanadada əhali artımı nəzarətdən çıxıb və o, Liberal hökuməti immiqrasiyanı daha da azaltmağa çağırıb. İcmalar Palatasının foyesində keçirilən mətbuat konfransında deyib ki, “əhali artımına ciddi məhdudiyyətlər qoyulmasını istəyirik ki, liberalların sistemimizə vurduğu zərəri aradan qaldıraq”: “Əhali nəzarətsiz şəkildə artır, sərhədimiz isə tamamilə açıq qalıb. Bu da narkotiklərin sərbəst dövriyyəsinə, qeyri-qanuni miqrasiyaya, insan alverinə və daha pis hallara səbəb olub”.
Poliyevr jurnalistlərin “əhali artımına ciddi məhdudiyyətlər” ifadəsində nəyi nəzərdə tutduğu ilə bağlı suallarını cavablandırmayıb.
Global News məsələ ilə bağlı əlavə açıqlama almaq üçün Kanada Mühafizəkarlar Partiyasına müraciət etsə də, xəbərin dərc olunduğu ana qədər cavab ala bilməyib.
Statistika Kanadanın məlumatına görə, 2021-2024-cü illər arasında ölkənin əhalisi təxminən 9 faiz artaraq 2024-cü ilin martında 41 milyon nəfərə çatıb. Bu, son 60 ildə ən sürətli daxili artımdır.
Əvvəlki baş nazir Castin Trudonun rəhbərlik etdiyi Liberal hökumət 2025-ci ildə daimi sakin kimi qəbul ediləcək şəxslərin sayını 500,000-dən 395,000-ə (21 faiz azalma), 2026-cı ildə 380,000-ə və 2027-ci ildə isə 365,000-ə endirəcəyini bəyan etmişdi. Hökumət, həmçinin, müvəqqəti sakinlərin ümumi əhaliyə nisbətdə payını 2026-cı ilin sonuna qədər 6.5 faizdən 5 faizə qədər azaltmağı planlaşdırır.
Baş nazir Mark Karni bu hədəfləri ümumilikdə dəstəkləyərək kabinet üzvlərinə ünvanladığı mandat məktubunda immiqrasiyanı “davamlı səviyyələrə” qaytarmaq istədiyini bildirib.
Mühafizəkarlar Partiyası isə seçki kampaniyasında daimi immiqrasiyanı “Harper hökuməti dövründəki səviyyəyə yaxın, davamlı səviyyəyə” endirəcəyini vəd etmişdi.
Stefen Harperin baş nazirliyi dövründə (2006-2016) Kanadada daimi immiqrantların sayı ildə 240,000 ilə 285,000 arasında dəyişirdi.
Foto: Adrian Wyld/The Canadian Press
